Hinikayat ni Secretary Ismael “Mike” Sueno ng Department of Interior
and Local Government (DILG) ang mga amo na may kasambahay sa kanilang tahanan
na iparehistro ang mga ito sa barangay.
 |
| DILG Secretary Mike Sueno |
Sa isang direktiba sa mga pinuno ng lokal na pamahalaan,
iniutos niya ang pagpapatupad ng Republic Act (RA) Blg.10361 o ang “Batas
Kasambahay” na nagtatakda sa mga amo na iparehistro nila ang lahat ng mga
katulong sa Registry of Domestic Workers in Barangays o Barangay Registration
of Kasambahays.
“Malaking papel ang ginagampanan ng mga kasambahay sa pagpapabuti
ng ating ekonomiya at lipunan. Sila ang
nangangalaga ng ating mga tahanan at tumitingin sa ating mga anak kapag tayo ay
nasa mga gawain natin,” sabi ni Sueno.
“Karapat-dapat lang na pangalagaan ang kanilang kapakanan
tulad din ng mga manggagawa sa pampubliko at pribadong sektor,” dagdag pa niya.
“Ang pagpaparehistro ng mga ito ay kapwa makabubuti sa
kanila gayundin sa kanilang mga amo,” pagbibigay diin niya.
Sa isang direktiba, nanawagan din ang DILG Secretary sa lahat ng mga punong barangay na magsagawa ng ordinansa sa kanilang barangay bilang suporta sa RA 1036 at ipatupad ang Barangay Registration of Kasambahays sa kanilang nasasakupan.
“Hinihikayat ko rin ang mga opisyal ng barangay na talakayin
ang pagpapatupad ng Batas Kasambahay sa Barangay Assembly Day sa ika-25 ng
Marso ng taong kasalukuyan,” sabi niya.
Sa ilalim ng RA 10361, ang isang kasambahay ay sinuman na
gumaganap ng mga gawain sa tahanan bilang isang manggagawa tulad ng katulong,
yaya, tagaluto, hardinero o tagapaglaba ngunit hindi kabilang ang mga madalang
o paminsan-minsan lang kung gumawa sa isang tahanan.
Hindi rin kabilang ang mga kabataang pinag-aaral at binibigyan ng baon at gastusin para sa mga project at gawain sa paaralan.
Barangay Kasambahay Desk
Noong Hulyo 2013, inatasan ng DILG ang mga punong barangay na magkaroon ng
Kasambahay Desks at magpatupad ng sistema upang matiyak na nairerehistro ang
lahat ng mga kasambahay sa kanilang barangay kasama na ang online registration
sa kanilang website o e-mail.
Maaring makakuha ng KR Form 1 at Kontrata sa Paglilingkod sa
Tahanan mula sa mga barangay at tanggapan ng Public Employment Service Office
(PESO) sa mga lungsod at pamahalaang bayan.
Maari rin na mai-download ang mga forms na ito mula sa www.dilg.gov.ph at www.dole.gov.ph.
Kailangang ipaalam ng mga amo sa Kasambahay Desk kung natapos
na ang kontrata ng kasambahay para sa updating ng mga record.
Ang
pagbibigay ng barangay o ng mga lokal na tanggapan ng PESO ng impormasyon
tungkol sa kasambahay o sa amo nito ay kinakailangang naaayon sa itinatakda ng
RA No. 10173 (Data Privacy Act of 2012) at iba pang batas na nakasasakop
dito. Ang mga lalabag ay papatawan ng
kaukulang multa o pagkabilanggo. (Isinalin
sa Filipino mula sa Manila Times Feb.
18, 2017 issue)
