Para
kay Ofelia Malaga, 63 anyos, ang mga pagsasanay kaloob ng
ibat-ibang ahensiya ng pamahalaan ay makatutulong para magbigay inspirasyon sa
maraming residente ng La Union na makagawa ng mga produktong de-kalidad at makipagsabayan sa world market.
Si
Ofelia, kasalukuyang barangay secretary ng Langcuas sa San Fernando
City, La Union, ay isa sa mga lumahok sa ikalawang batch ng “Business, Planning
Training and Workshop” na isinulong ng pamahalaang lungsod noong ika-21 hanggang
24 ng Pebrero, 2017.
Layon
ng pagsasanay na palakasin ang mga napiling income generating projects (IGPs)
sa lahat ng barangay sa Lungsod ng San Fernando.
May
118 opisyal ng barangay at mga residente mula sa 59 na barangay sa lungsod ang
lumahok sa pagsasanay na kung saan tinukoy ng bawat barangay ang mga agri-products na kanilang isusulong.
Ang
napiling proyekto ng mga taga-Barangay Langcuas ay ang paggawa ng alak mula sa
ube.
 |
| Isang marka ng ube wine. Photo: The Cordillera Sun |
“Inilunsad
namin ang ube wine-making project bilang IGP namin noong Oktubre 2014 nang
mabigyan kami ng pamahalaang lungsod ng paunang tulong na P50,000 para makabili
ng mga kagamitan at materyales,” sabi ni Malaga.
Nakipag-ugnayan
din ang barangay sa Don Mariano Marcos Memorial State University (DMMMSU) at
ang pamahalaang lungsod ng San Fernando.
Sa
kasalukuyan, dalawang residente ang nag-aasikaso ng ube wine processing plant
na pansamantalang nasa barangay hall ng Langcuas.
“Tamang-tama ang pagkakaroon namin nitong business planning workshop and training para
matuto at ma-inspire kami sa tamang paggawa ng aming mga produktong alak mula
sa ube hindi lamang sa pagpo-proseso nito kung hindi pati na rin sa pagpo-promote
at pagdadala sa mga pamilihan,” dagdag ni Malaga.
Bukod
sa ube wine, ang mga residente ay gumagawa rin ng iba pang produkto mula sa ube
tulad ng ube pastillas at ube puto.
“Kailangan
namin ng mga pagsasanay sa product innovation at packaging para makaabot kami
sa standards na itinatakda ng Department of Science and Technology (DOST) at ng
Bureau of Food and Drugs (BFAD),” sabi
niya.
Sinabi
naman ni Ofelia V. Mendoza, ang economic and business development officer ng
pamahalaang lungsod ng San Fernando, pinangunahan ng kanyang tanggapan ang
pagsasagawa ng business planning and training para isulong ang mga produkto mula sa
income generating projects o IGPs ng mga barangay.
Ayon sa kanya, ang pagsasanay ay
makatutulong sa residente ng mga barangay para makagawa ng mga produktong
de-kalidad at maging kaakit-akit ang mga ito sa mga mamimili.
