PNP Tutulong sa Pagsasanay ng mga Barangay Tanod para sa Seguridad ng mga Paaralan

 

Inatasan ng Philippine National Police (PNP) ang mga hepe ng pulisya at mga pinuno ng yunit nito na makipag-ugnayan sa mga lokal na pamahalaan (LGU) upang pag-aralan ang mga posibleng programa sa pagsasanay para sa mga barangay tanod na tutulong sa pagpapalakas ng seguridad sa mga paaralan at iba pang pasilidad ng pag-aaral.

Ayon kay PNP Chief Police General Jose Melencio C. Nartatez Jr., layunin ng pagsasanay na ihanda ang mga barangay tanod sa mas malawak nilang tungkulin sa seguridad kasunod ng kasunduan ng Department of the Interior and Local Government (DILG) at Department of Education (DepEd).

Malugod na tinanggap ni Nartatez ang kasunduang nilagdaan nina Interior Secretary Juanito Victor “Jonvic” Remulla at Education Secretary Sonny Angara. Aniya, makatutulong ang pagtutulungan ng dalawang ahensiya upang mapalakas ang seguridad sa loob at paligid ng mga paaralan, alinsunod sa direktiba ni Pangulong Ferdinand “Bongbong” R. Marcos Jr.

“Sa antas ng barangay nagsisimula ang kaligtasan sa mga paaralan. Nais naming matiyak na handa ang ating mga barangay tanod na gampanan ang kanilang mga tungkulin sa pamamagitan ng wastong pagsasanay, sa pakikipag-ugnayan sa mga lokal na pamahalaan,” ani Nartatez.

Kabilang sa mga planong pagsasanay ng PNP ang tamang pagsasagawa ng pagpapatrolya at iba pang tungkuling may kaugnayan sa seguridad. Tatalakayin din ang mga batas na dapat nilang malaman upang maunawaan ang mga hangganan ng kanilang kapangyarihan at maiwasan ang mga problemang legal habang ginagampanan ang kanilang tungkulin.

Tutulong sa mga pampubliko at pribadong paaralan

Sa ilalim ng kasunduan ng DILG at DepEd, maaaring italaga ang mga barangay tanod sa mga pampubliko at pribadong paaralan, iba pang institusyong pang-edukasyon, at Community Learning Centers na nasa ilalim ng pangangasiwa ng DepEd. Layunin nilang suportahan ang mga kasalukuyang tauhan ng seguridad ng mga paaralan.

Maaari ring humingi ng tulong ang mga paaralan sa kanilang LGU kapag may insidente na may kinalaman sa seguridad. Layunin ng mga hakbang na ito na protektahan ang mga taong nasa agarang panganib, tiyakin ang seguridad sa mga lugar na apektado, at iulat ang mga insidente sa mga opisyal ng paaralan o kinauukulang awtoridad na nagpapatupad ng batas.

Pinahihintulutan din ng kasunduan ang mga barangay tanod na magsagawa ng awtorisadong inspeksiyon sa mga bag, personal na gamit at sasakyan sa mga itinalagang pasukan ng paaralan.

Ayon sa PNP, kung walang electronic scanner na kayang magsuri sa buong katawan, kailangang isagawa ang pag-inspeksiyon sa mga bag at pasukan alinsunod sa awtorisadong pamamaraang hindi nangangailangan ng pisikal na paghawak.

Mga dagdag na mata at tainga sa komunidad

Binigyang-diin ni Nartatez na ang paglahok ng mga barangay tanod sa seguridad ng mga paaralan ay makatutulong sa pulisya na mabantayan ang mga paligid nito at matugunan ang mga posibleng banta bago pa lumala ang mga ito.

Makakatulong din ang kanilang presensiya upang matukoy ang mga kahina-hinalang gawain at maiparating agad sa mga awtoridad ang mahahalagang impormasyon. Sa gayon, mas mabilis na makakakilos ang pulisya at iba pang mga tagatugon sa emerhensiya.

“Ang mga barangay tanod ay magsisilbing dagdag na puwersa ng komunidad upang matiyak na walang banta ang makagagambala sa seguridad sa paligid ng ating mga paaralan. Palalakasin nila ang ating pagpapatrolya sa loob ng bakuran ng mga paaralan at sa mga kalapit na lugar, gayundin ang koordinasyon ng mga opisyal, lalo na kapag may mga banta,” ani Nartatez. (Pinagmulan ng ulat: Manila Bulletin.  May-ari ng larawan: PNP)