MGA "PATAY" NAGPROTESTA SA BARANGAY

Panglao, Bohol, May 2015.  Nagkaroon kamakailan ng isang public hearing sa Barangay Tangnan sa Panglao Island, Lalawigan ng Bohol para sa pagtatayo ng isang jetty port o daungan ng mga sasakyang dagat na gamit sa pangingisda at paghahatid ng mga kalakal.

Subali’t may mga taga barangay na nagprotesta sa nasabing proyekto at naghain pa ng manipesto ng pagtutol  dahil makasisira raw ito sa kalikasan, tataas ang kriminalidad at iba pang mga dahilan. May mga nagsasabi na ang mga pagtutol ay bunsod lamang ng mga udyok ng mga kalaban sa pulitika ng mga nakaupo sa pamahalaang lokal.  May mga nakapuna pa na ang ibang pangalang nakalista sa manipesto ay pawang mga patay na!   

Kinumpirma ni Punong Barangay Cirilo Gatase, Jr. na isang barangay resolution ang inaprubahan at ipinasa noong ika-9 ng Hunyo, 2014 ng Sangguniang Barangay.  Ang resolution ay nagpapahintulot sa kanya na pumasok sa isang kasunduan sa kumpanyang C. Harrison Power Enterprises ng Ormoc City para  magtayo at patakbuhin ang nasabing daungan para sa paghahatid ng mga gamit na kakailanganin sa pagtatayo ng bagong Bohol Airport.

Ang nasabing jetty, na katulad ng isang mahabang tulay mula sa tabing dagat para makadaan ang tao’t sasakyan at makalapit sa mga nakadaong na sasakyang dagat, ay 50 metro ang lapad, 300 metro ang haba at may lalim na 15 metro. 

 Larawan ng Isang jetty port sa Australia.  Photo:  Wikipedia

Wala halos gagastusin ang barangay sa pagtatayo nito maliban sa pagsasaayos ng mga papeles at permiso mula sa mga lokal at nasyunal na ahensiya ng gubyerno.   

Kapag nakatayo at nagagamit na, kikita pa ang barangay mula sa mga docking fees at buwis.  Makikinabang din ang barangay sa pagsasaayos ng mga kalsada mula sa daungan patungo sa highway na ang mga gastusin ay sagot din ng kontratista.

Kung tutuusin, makabubuti para sa isang barangay ang ganitong proyekto. Masuwerte ang mga barangay tulad ng Tangnan na sa ayaw at sa gusto nito ay nasa landas ng progreso at kaunlaran.  Nasa kanila na kung sasamantalahin nila ang ganitong mga pagkakataon.

Dagdag pa rito, ang sistemang napili para ito ay maisakatuparan ay napapanahon at nalilinya sa tinatawag na Public-Private Partnership na kung saan ang mga proyektong hindi kayang pondohan at isakatuparan ng pamahalaan ay inaako ng pribadong sektor. Ito ngayon ang  makabagong modelo para mapabilis ang pag-unlad ng isang bayan, lalawigan gayundin ng isang barangay.

 

Madaanan man o hindi ang isang barangay ng progreso, napapanahon na para sa mga punong barangay na baguhin ang kanilang pananaw sa pagpapaunlad ng kani-kanilang mga barangay. 

Dapat ang kanilang mindset ay hindi nakatuon lamang sa kung paano pagkakasyahin ang kanilang Internal Revenue Allotment o IRA. Ang isang punong barangay ay tulad din ng isang CEO o Chief Executive ng isang kumpanya at ang barangay na kanyang pinamamahalaan, tulad naman ng isang korporasyon.   

Pangunahing tungkulin ng isang punong barangay na palakasin ang ekonomiya ng kanyang barangay na nasasakupan.  Nang sa ganoon ay magkaroon ito ng karagdagang kita at budget para matustusang lahat ang kailangang serbiyso para sa mga mamamayan nito. 

Ito dapat ang prayoridad ng isang punong barangay, ang sumabay sa makabagong sistema ng pamamahala. (Pinagmulan ng ulat: Bohol Daily News)