Liga ng mga Barangay suportado ang Martial Law extension

Nagpahayag na ng kanilang pagsuporta ang Liga ng mga Barangay sa Pilipinas sa hakbang ni Pangulong Rodrigo Duterte na palawigin ang martial law sa Mindanao para matuldukan na ang kaguluhang nilikha ng Maute Group at iba pang teroristang grupo.

Sa inilabas ng resolusyon ng Liga ng mga Barangay sa Pilipinas, sang-ayon ang grupo na magkaroon ng extension ang martial law sa Mindanao upang matapos na ang gulo at magkaroon na ng katahimikan ang naturang lugar.

Ayon sa nilagdaang resolusyon ng mayorya ng National Executive Board ng Liga ng mga Barangay sa Pilipinas na pinamumunuan ni Atty. Edmund Abesamis, sa pamamagitan ng pagpapalawig ng martial law sa Mindanao ay mas mapadadali sa tropa ng gobyerno na matapos ang gulong sinimulan ng Maute Group.

Naniniwala rin ang Liga ng mga Barangay sa Pilipinas na hindi inaabuso ng Armed Forces of the Philippines at Philippine National Police ang idineklarang martial law sa Mindanao dahil ang tanging hangarin lamang ng batas militar ay sugpuin ang mga teroristang grupo.

Matatandaang noong May 23, 2017 nang ideklara ang Proclamation No. 216 (martial law) sa Mindanao na tumagal ng 60 araw base sa nakasaad sa batas at ngayong natapos na ang dalawang buwan ay hindi pa rin tuluyang nauubos ang mga terorista sa Marawi City kaya’t sa isinagawang joint session ng Kongreso, inaprubahan ang pagpapalawig sa martial law.

Ito’y base na rin sa kahilingan ni Pangulong Duterte na magkaroon ng extension ang martial law hanggang sa December 31, 2017 upang tuluyang masugpo ang mga terorista sa Marawi City at iba pang karatig na lugar.

May mga taga-Metro Manila ang labis na tumututol sa pagpapalawig ng martial law ngunit agad naman itong kinontra ng mga mismong naninirahan sa Mindanao.

Ayon pa nga sa kababayan nating naninirahan sa Mindanao, hindi sila natatakot sa pagpapatupad ng martial law dahil ang tanging layunin ng batas militar ay sugpuin ang mga nanggugulo sa kanilang lugar.

Naging usap-usapan pa nga sa social media ang tungkol sa martial law dahil karamihan sa mga taga-Mindanao ay pabor sa batas militar habang ang ilan namang nasa Luzon ay siya pa ang tumututol.

Nakatatawang isipin na kung sino pa ang hindi naaapektuhan ng martial law ay sila pa mismo ang tumututol dahil hindi nila naiintindihan ang damdamin ng mga taga-Mindanao na labis na naaapektuhan ng kaguluhan.

Hangarin ng Pangulo na matapos na ang kaguluhan sa Mindanao at tuluyang magkaroon ng kapayapaan ang naturang lugar kaya’t hinihiling nito ang pagpapalawig sa martial law. (Reposted from Daily Star Ph)

PHOTO CREDIT:  National Liga President Atty. Edmund Abesamis - GMA Network

Walang permit para sa mga barangay na 'pasaway' sa Iloilo City

Iloilo City – Hindi bibigyan ng permit para sa anumang mga gawain ang barangay na hindi tumutulong sa pagsugpo ng iligal na droga, ayon kay Kon. Reyland Hervias, Pangulo ng Liga ng mga Barangay ng Iloilo City.

Ang mga permit na ito ay kinabibilangan ng mga gawain tulad ng mga parada, programa, perya, sound system, ‘binayle’ o benefit dance at iba pa, ayon sa Punong Barangay na nakaupo bilang Konsehal sa Sangguniang Panglunsod ng Iloilo na may 180 na barangay.

Tanging mga “gawaing pang relihiyon” lamang sa mga barangay na ito ang iisyuhan ng permit tulad ng prusisyon, bigay diin ni Hervias.

Ang mga Sangguniang Barangay ay tinaningan hanggang katapusan ng Agosto 2017 na maipakita na nakasunod sila sa mga panuntunan para maideklarang drug-free na ang kanilang lugar.

“Sa katapusan ng Agosto, malalaman na namin kung aling barangay ang nakatupad at alin ang hindi o hindi man lang nagisisikap na makatupad,” ayon pa kay Hervias.

Binalaan niya na mahaharap sa mga kasong administratibo ang mga opisyal ng barangay na hindi nakikipagtulungan.

 Sa kabilang banda, pinabulaanan ni Hervias na labis na pine-pressure ni Mayor Jed Patrick Mabilog ang mga opisyal ng barangay sa gitna ng akusasyon ni Pangulong Duterte na ang Mayor ay isang drug protector.

“Sa katunayan, gusto nga silang matulungan ng mayor na bumisita sa iba’t-ibang barangay ng lungsod kamakailan,” sabi ni Hervias.

Samantala, binigyang diin ng isang DILG memorandum ang kahalagahan ng  anti-drug abuse councils (BADACs) na pinamumunuan ng punong barangay sa kampanya laban sa iligal na droga. 

Sa ilalim ng DILG memorandum, ang hindi paglalaan ng bahagi ng kanilang budget para masuportahan ang Comprehensive Dangerous Drugs Act of 2002 ay dahilan para hindi maaprubahan ang taunang budget ng barangay.

Hinihimok ni Mabilog ang mga Ilonggo na baguhin ang negatibong tingin sa Lungsod ng Iloilo.  Tinawag ni pangulong Duterte and Iloilo na “most shabu-lized” at “bedrock” ng iligal na droga. 

Hinimok rin ng alkalde ang media na ipahayag ang “tunay na larawan” ng Iloilo “sa mundo.”  

Para sa Philippine Drug Enforcement Agency at Philippine National Police, maaari nang ideklara na drug-free ang isang barangay kung natupad na ang mga sumusunod: 

* wala nang makuha o mabiling droga sa lugar

*wala nang iligal na droga na dumaraan sa barangay para         ipamahagi sa ibang lugar 

* walang laboratoryo sa paggawa ng iligal na droga

* walang bodega ng iligal na droga

*walang pataniman ng marijuana

*walang drug den

*walang drug pusher

*walang drug users/dependents

*walang mga protector at financier

Kailangang ang mga barangay council o BADAC ang maghanda ng mga dokumento tungkol dito.

Sinabi ni Hervias na nahihirapan ang mga barangay na kumbinsihin ang mga drug personality na sumailalim ng rehabilitasyon.

Diin pa ni Superintendent Remus Zacharias Canieso, City Police Director, ang rehabilitation ay kinakailangan sa pagsugpo ng droga.  Ang Iloilo City Police Office ay bahagi ng oversight committee na umaalam kung nakatutupad ang mga barangay.

“Kung may drug users dapat mag-conduct ang mga barangay councils ng drug rehab program. Hindi  pwedeng may drug users sa barangay tapos walang intervention na ginagawa,” sabi ni Canieso. (Panay News)

Photo Credit:  Iloilo City Hall, iloilocity.gov.ph

Like us on Facebook and Share.

Mga senador nagkahati-hati sa panukalang ipagpaliban ang halalang barangay

Nagpahayag ng magkakaibang pananaw ang mga senador sa panukalang ipagpaliban ang halalang barangay.

 Para kay Senador Paolo Benigno “Bam” Aquino, mahalaga na ang mga mamamayang Filipino ay may pagkakataon na piliin ang kanilang mga pinuno.

 “Pag may postponement, may holdover status at sa palagay ko, ayon sa isinasaad ng ating mga batas, hindi kinakailangan ang holdover status ng mga halal na opisyal.  Hindi rin maaring basta-basta na lamang sila tatanggalin sapagkat sila ay naihalal.  Dapat may tamang proseso dahil halal sila ng taumbayan at kadalasan, ang basta pagtatalaga lamang ay hindi pinapayagan ng batas”. 

Sa kanyang talumpati naman kamakailan sa ginanap na Strategic Consultation and Workshop on Federalism, Barangay Reform, and Role of Barangays in National Security Concerns na inorganisa ng Liga ng mga Barangay, hinamon ni Senador Aquilino Pimentel lll ang mga punong barangay na linisin nila ang kanilang hanay para mapatunayan nila kay Pangulong Duterte na walang katotohanan ang napaulat na aabot sa 40 porsiyento ng mga namumuno sa barangay ay sangkot sa iligal na droga.

“Kung mali ang naturang report, marahil ay wala nang dahilan para pag-usapan pa ang pagtatalaga at pagpapalit ng mga opisyal ng barangay," sabi ni Pimentel.

Subali’t dagdag niya na kailangang patunayan ng mga punong barangay sa Pangulo at sa mga anti-drug agencies tulad ng Philippine National Police at ng Philippine Drug Enforcement Agency na walang katotohanan ang nasabing report.

“Kaya sa palagay ko ay isang hamon iyan sa bawa’t isa sa inyo,” ayon saPangulo ng Senado.

Sinabi pa ni Pimentel na”kung ang isang barangay ay drug-infested, heavily drug-infested, ang ating intelligence community ay hindi malayong mag-isip na sangkot nga sa droga ang mga pinuno ng barangay…natural lang na maging ganoon ang kanilang paniniwala."  

Hinimok din ni Pimentel na kailangang ipakita ng pamunuan ng barangay sa mga gumagawa ng polisiya na sila ay masugid sa pagpapaigting ng kanilang pagkilos para masugpo ang salot na droga.  

Madalas nang mabanggit ni Pangulong Duterte na ginagagamit lang ng mga sindikato ng droga ang halalang barangay para sa kanilang kapakanan.  Naniniwala si Pangulong Duterte na kapag natuloy ang halalan, ang mga kandidatong may kuneksiyon sa droga ang tiyak na mananalo.

 Ayon sa mga umiiral na batas, kinakailangang maamyendahan muna ang batas bago makapagtalaga ang Pangulo ng mga opisyal sa mahigit na 42,000 barangay sa bansa. 

Samantala, isinulong ni Senate Majority Leader Vicente Sotto ang Senate Bill 1469 noong ika-23 ng Mayo 2017 na nagsasaad na sa halip na sa ikaapat ng Lunes ng Oktubre 2017 ganapin ang halalang barangay at SK, ipagpaliban na lamang ito sa Oktubre 2018.  Sinabi niya na magbibigay daan ito para maimbistighan ang mga may kuneksiyon sa iligal na droga.

Sinabi naman ni Sen. Francis Escudero na karapatan ng Kongreso na itakda ang termino ng mga opisyal ng barangay gayundin ang petsa ng halalan at tinanong din niya kung gaano katagal ito ipagpapaliban.

"So hold-over lang ba ang istado nila o tatanggalin?  At kung sila ay tatanggalin dapat nating alalahanin na halal na opisyal ang mga ito.  Dapat din nating kilalanin na pinili sila ng kanilang mga nasasakupan at hindi natin maaring suwayin ang hangad ng taumbayan."

Hinimok din ni Escudero ang  Department of Interior and Local Government na magsampa ng kaukulang kaso laban sa mga napaghihinalaang opisyal ng barangay, kung may mga ebidensiya na kakutsaba nga sila ng mga sindikato sa kanilang mga nasasakupang lugar.

Pinuna naman ni Senator Sherwin Gatchalian ang DILG sa hindi nito pagsasagawa ng nararapat na aksyion laban sa mga opisyal ng barangay na sangkot sa iligal na droga.

 Sinabi ni Gatchalian na ang pagpapaliban ng halalang barangay ay hindi katanggap-tanggap para sa kanya dahil sa ito na ang pangalawang beses na ang kasalukuyang administrasyon ay humingi ng postponement. 

“Ano nangyari sa loob ng isang taon?  Ang katwiran sa unang pagpapaliban ay tanggalin ang sinasabing 40 porsiento ng mga kapitan ng barangay na sangkot sa iligal na droga.  Ang tanong ko, ano na ang nangyari doon sa 40%, tinanggal na ba?”

Hiningi niya na magbigay ang DILG ng ulat dahil malaki na ang panahong ibinigay sa departamento na linisin ang hanay ng barangay.

Para kay Senador Franklin Drilon naman, sa pagpapahayag ng kanyang pagtutol sa posibleng pagpapaliban ng halalan, ang taumbayan ang siyang dapat na pumili ng kanilang mga pinuno sa pamamagitan ng isang bukas at malinis na halalang barangay at SK. (SunStar Philippines)

Photo Credits: bamaquino.com; en.wikipedia.org; untvweb.com; rappler.com; politics.com.ph; gmanetwork.com. English Version: Barangay Reporter

Pagkuha ng barangay clearance at mayor’s permit pag-iisahin na

Pinag-aaralan ngayon ng DILG at mga lokal na pamahalaan na pag-isahin na ang pag-iisyu ng barangay clearance at business permit sa bawat lungsod at bayan sa buong bansa.

Sinabi ni DILG Officer-in-Charge Catalino S. Cuy sa isang consultation-workshop na ginanap kamakailan na tinitipon na nila ang lahat ng mungkahi mula sa mga LGU bilang bahagi ng pagsasa-ayos ng pangongolekta ng mga bayarin sa barangay. 

Ito ay bilang paghahanda sa pagpapatupad ng sistemang kasama na ang barangay clearance sa ini-isyung business permit ng Business Permit at Licensing Office (BPLO) ng mga LGU.

“Sa simula pa lamang, may malinaw na direktiba na ang Pangulong Duterte na pabilisin ang proseso ng pag-iisyu ng business permit ng mga LGU.  Mas lalong ma-eenganyo ngayon ang mga negosyante na makipagtransaksiyon sa mga LGU dahil mas mabilis na silang mabibigyan ng permit ng mga lokal na pamahalaan” sabi ni Cuy.

Bago pa ito, inatasan ng Pangulo ang lahat ng mga tanggapan ng pamahalaan na bawasan ang mga requirements sa pakikipag-transaksiyon sa gobyerno para mas mapabilis ang mga pangunahing serbisyo.

Sa nasabing workshop na ginanap sa Napolcom-DILG Center, isa sa mga nag-share ng kanilang karanasan sa pagsasanib ng barangay clearance sa kanilang sistema ay ang Lungsod ng Valenzuela.  Sa kasalukuyan, 22 na sa 33 barangay ng Valenzuela ang may ordinansa na nagbibigay kapangyarihan sa lungsod na mangolekta ng mga bayarin para sa barangay business permit.

  

Ang ilan sa mga dumalo sa nasabing pulong ay mga BPLO ng
Valenzuela, Marikina, Paranaque, Manila at Quezon City.Naroon din ang mga kagawad ng Barangay San Roque ng Marikina at Barangay Gen. T. Deleon ng Valenzuela, mga model LGUs sa pagbabalangkas ng polisiya at alituntunin para mapabuti pa ang sistema sa pag-iisyu ng business permit. 

Nasa pulong din ang mga kinatawan ng Bureau of Local Government Finance (BLGF) sa ilalim ng Department of Finance at Bangko Sentral ng Pilipinas (BSP).

Ang DILG, sa pamamagitan ng Bureau of Local Government Development (BLGD), ay magsasagawa na ng mga hakbang at gawain para mas makubinsi at makuha ang suporta ng publiko sa pagpapatupad ng sistema.  

Nagsimula na rin ang konsultasyon ng mga BPLOs, Department of Trade and Industry (DTI), National Competitiveness Council (NCC) at Department of Finance (DOF) tungkol sa standardization ng mga forms na gagamitin. (DILG News Archives) Photo Credit: Wikipedia.

Apat lamang sa 182 barangay ng Davao ang may MRF

Ayon sa isang COA report na pinalabas noong ika-22 ng Hunyo, 2017, apat lamang sa 182 na barangay sa Lungsod ng Davao ang nakatupad sa Section 32 ng RA 9003 o Ecological Solid Waste Management Act na nagtatakda na magkaroon ng material recovery facilities (MRF) ang bawat barangay.

Sa ulat, lumalabas na 98% ng mga barangay sa sariling bayan mismo ni Pangulong Duterte ay hindi nakasusunod sa batas na naglalayong isulong ang recycling para pababain ang gastos sa pangongolekta at paliitin ang dami ng basura na itinatapon sa mga landfill.

Ayon sa record ng City Environment and Natural Resources Office (CENRO), dapat may 16 na MRF na ang naitatayo at nagagamit ngunit lumilitaw sa ginawang inspeksiyon ng mga awditor ng pamahalaaan na ang mga barangay na may MRF lamang ay ang Barangay Crossing Bayabas, Dumoy, Hizon at Mahayag.  

 “May naitayo na dating mga MRF sa Barangay Gov. Paciano Bangoy, San Antonio-Agdao, Centro-San Juan, Lapu-lapu, Sasa, Matina Pangi at Calinan Proper ngunit natigil dahil sa iba’t ibang kadahilanan tulad ng kakulangan ng pondo at pabago-bagong prayoridad ng administrasyon" ayon sa mga awditor.

Makikita sa isang kwenta ng mga ginastos ng pamahalaang lungsod noong 2016 na naglaan ng P151.74 million para sa “environment/sanitary services,” mas mataas ng P17.02 milyon kumpara sa ginastos para dito noong 2015.

Ang pagkukulang ay hindi dahil sa hindi naiintindihan ng mga opisyal ng barangay sa Davao ang kanilang mga obligasyon sa ilalim ng batas.  Naging kapuna-puna pa nga sa mga taga-COA na “mataas ang antas ng kanilang pagkakaunawa sa Solid Waste Management Act”. Ang problema ay nasa mga opisyal ng lungsod na nagpapatupad ng batas, ayon sa kanila.

Sabi ng mga opisyal ng Barangay Dumoy, Calinan Proper, Matina Pangi at Indangan, pinapayagan daw ng City Environment and Natural Resource Office o CENRO ang pangongolekta ng hindi naihiwalay na basura at ang pagsasama-sama ng iba’t ibang uri nito. 

Kinumpirma ito ng isang survey na isinagawa ng mga awditor sa mga residente ng 14 na barangay na may malalaking populasyon.

Ayon sa COA, ang ganitong mga gawi ay hindi lamang nagpaparami ng basurang kokolektahin at itatapon, kontra sa sistema ng 'waste segregation', kung hindi nagpapalaki pa ng gastos sa upa ng mga trak na panghakot. 

Bukod pa rito, sa halip na mapakinabangan pa ng matagal ang mga sanitary landfill na pinagtatapunan, madaling napupuno ang mga ito dahil sa pagtatapon ng hindi naihiwalay na basura.

Napatunayan lahat ito sa isang isinagawang inspeksiyon ng mga taga COA sa Davao Sanitary Landfill na nasa Barangay New Carmen sa Tugbok, Lungsod ng Davao.

Ang P268 Million Davao City Sanitary Landfill 

Tinanggap naman ni Engr. Elisa P. Madrazo, CENRO ng Davao City ang kinalabasan ng awdit ngunit ipinagtanggol pa rin niya ang kanyang tanggapan at sinabi na, “in good faith”, inaasahan niya ang mga barangay sa lungsod na tutupad sa kanilang tungkulin ayon sa itinatakda ng batas.

Tiniyak naman niya ang mga awditor na palalakasin pa ng CENRO ang pagpapatupad ng RA 9003 sa pamamagitan ng mas masusing pagmamatyag at pakikipag-ugnayan sa bawat barangay. (Malaya Business Insight) Photo Credits: Rappler. com; Durian Post. 

Walang kinokolektang pera ang PDP-Laban para magpuwesto ng opisyal ng barangay

Senator Aquilino "Koko" Pimentel III. Photo Credit: Inquirer File Photo

Ayon kay Senate President Aquilino “Koko” Pimentel III, ang PDP-Laban ay hindi nangungulekta at hindi kailanman tatanggap ng anumang kabayaran mula sa mga nais magkaroon ng puwesto sa barangay.

Sa isang panayam sa Inquirer, sinabi niya na walang ganitong programa ang PDP-Laban o anumamg grupo, laluna iyong mga sumusuporta kay President Duterte.

Wala pa naman aniya na batas ang nagpapawalang bisa ng halalang barangay na nakatakda sa Oktubre at magtatalaga na lamang ng mga opisyal sa mahigit na 42,000 barangay sa buong bansa.

Nagbabala si Pimentel na mag-ingat sa mga taong ginagamit ang pangalan ng PDP-Laban para manghingi ng “registration fees” o kabayaran mula sa mga nais ma-appoint na opisyal ng barangay.

Lokohan Aniya, ang kapalit daw ng mga kinokolektang pera ay para mapasama sa listahan na gagamitin sa pagpili ng mga opisyal ng barangay kapag pinagpaliban ang halalan.

Sinabi ni Pimentel na may mga napaulat na mga insidente ng pangangalap ng pera sa Pampanga, Bicol at ilang bahagi ng Mindanao. Para mapigilan ang mga ganitong pangyayari, lalong pinabilis ng PDP-Laban ang pagre-reorganisa nito sa buong bansa at ang pagtatalaga ng mga tao sa mga lugar na hindi pa nasasakupan ng partido.

Sa ganitong paraan, madaling malaman kung sino ang tao ng partido sa bawat lalawigan at kung may isang grupo halimbawa ang pumunta sa Pampanga para mangalap ng pera sa pangalan ng partido, madaling mai-verify, sabi ni Pimentel.

Nais ni Presidente Duterte na ipagpaliban ang halalang barangay sa kadahilanang 40% ng mga opisyal ng mahigit 42,000 barangay sa buong bansa ay kurap o sangkot sa iligal na droga. (Inquirer.netInquirer.net)

Kapitan ng barangay arestado sa pagtatago ng baril na walang lisensiya

Photo Credit:  PNP Lipa Facebook

Isang kapitan ng barangay ang inaresto sa pagtatago ng di-lisensiyadong armas sa kanyang bahay sa Lipa City sa lalawigan ng Batangas kamakailan, ayon sa pulisya.

Sinabi ni Chief Inspector Zyrus Serrano, provincial officer ng Batangas CIDG, si Kapitan Rodelio Fajutag, 60 ng Barangay San Guillermo, Lungsod ng Lipa, ay inaraesto  sa kanyang barangay mismo noong ika-25 ng Mayo.

Dagdag pa ni Serrano na ang nagsilbi ng search warrant kay Fajutag ay ang pinagsanib na puwersa ng Batangas CIDG, CIDG Region 4A at ng Batangas Provincial Safety Office.

Ang nag-issue ng search warrant ay si Judge Agripino Morga ng San Pablo City para sa kanyang di-umano’y paglabag sa Republic Act 10591 o ang “Comprehensive Firearms and Ammunition Regulation Act.”

Ang nakuha mula sa suspek ang isang kalibre-45 na baril, isang magazine at 5 bala.

Si Fajutag at ang mga nakumpiskang ebidensiya ay dinala sa CIDG Batangas Office para maihanda nag kaso laban sa suspek. (Inquirer.net)