Barangay Sa Laguna Binago Ng Bilyonaryong Kapitan

Si Punong Barangay Eugenio S. Ynion Jr.

Dahil nais niyang mapalapit ng tirahan sa mga kaanak, nagpasiya ang negosyanteng si Eugenio S. Ynion Jr. na lumipat sa tahimik na lugar na ito sa Laguna para dito na manirahan at para mapalayo na rin sa ingay at kaguluhan ng Metro Manila.                      

"Mahabang kwento”, ang sinabi niya tungkol sa desisyon niya na lumipat sa La Marea - may sampung taon na ang nakalilipas - isang esklusibong subdibisyon malapit sa hangganan ng Metro Manila at Laguna, “ang gusto ko talaga ay mapalapit sa aking mga kapatid na naninirahan na rito”.  

Ang La Marea, na nasa Barangay San Antonio sa Lungsod ng San Pedro sa Laguna, ay pawang may kaya ang karamihan ng mga naninirahan. Magagara ang  mga tahanan, nasa matanawing bahagi ito ng lungsod. Tahimik at maginhawa ang klima sa  lugar na hinihipan ng malamig na hangin laluna kung gabi na nagmumula sa Lawa ng Laguna.  Tamang-tama ang lugar na ito sa mga nagnanais ng tahimik na pamamahinga sa gabi matapos ang maghapong gawain sa upisina.  

Tubong Iloilo, kuntento na sana si Jun sa kanyang sitwasyon nguni’t may mga pangyayaring naganap sa kanyang barangay na nagpabago sa takbo ng kanyang buhay – at ng barangay San Antonio mismo. 

“Labis akong nabahala sa problema ng barangay namin sa basura, sa mga nakawan at iba pang krimeng madalas na maganap dito.  Bagamat lagi akong  nakikipag-ugnayan sa aming mga opisyal dito, wala akong makitang agarang solusyon mula sa kanila” sabi niya.  

Ang Barangay San Antonio ang pinakamalaking barangay sa Lungsod ng San Pedro.  May kabuuang sukat ito na 780 ektarya at pangalawa sa pinakamaraming naninirahan na humigit kumulang ay 52,000 mga residente.

Maganda sana ang hinaharap ng komunidad na ito kung hindi sa talamak na problema sa droga at kahirapan ng maraming mamamayan dito.  Ang mga ito marahil at iba pang problema ang siyang humihila rito pababa kasama na rito ang mga mga kurap na opisyal ng barangay.  Ayon sa kanya, mas mahalaga pa sa kanila kung paano maipapasok ang mga kamay  sa kaban ng bayan.  

Ito ay noong hindi pa siya ang Punong Barangay. Sa halalang barangay noong 2013, tumakbo siya sa nasabing puwesto at nanalo kung kaya’t isang Ilonggo na ngayon ang namumuno sa Barangay San Antonio na pawang mga Tagalog ang karamihan ng mga sinaunang nakatira.  

Mula nang naupo siya bilang Punong Barangay, malaki ang nabago sa takbo ng buhay ng mga taga Barangay San Antonio. Naging isa itong huwarang komunidad. Umasa ito, hindi lamang sa pamamagitan ng sariling kakayahan nito, kung hindi pati na rin ng tulong mula sa kanyang mga kumpanya sa pagpapanatili ng katahimikan at kaayusan, pagkakaloob ng hanapbuhay at marami pang mga programa at serbisyong pangkalusugan, edukasyon at kapaligiran.  

Ngayon ang Barangay San Antonio ay may sarili nang fire truck, mga rescue boats, school buses, mga motorsiklo at iba pang sasakyan gayundin ng iba’t ibang gamit pangkomunikasyon para mapaigi ang serbisyo sa mga mamayan.   

Ang pagpapaigting ng kampanya laban sa droga ay nakasilo ng mahigit 40 pushers. Libre ang serbisyong pangkalusugan, ang edukasyon ay binibigyan ng pangunahing pansin kasama na rito ang pamimigay ng mga gamit pang eskwela.  Ang kanyang mga kumpanya naman ay nagpaluwal sa pagpapagawa ng San Antonio Exchange Terminal at Casa de San Antonio para akitin ang mga mamumuhanan at paramihin ang mga trabaho’t kabuhayan.  

Ayon sa kanya, bilang Punong Barangay, ang serbisyo publiko ay parang isang kawang-gawa.  Upang maging epektibo, kailangang ng tuluy-tuloy na mga proyekto. 

“At para magpatuloy ang mga ito, kailangang nasa ayos ang paggamit ng pondo ng gubyerno” dagdag pa niya.  “Ako’y naniniwala na para maging epektibo ang isang naglilingkod sa bayan, kailangan ng maayos at  mabuting pamamahala at walang halong kurapsiyon.”  

Sa ngayon, mas nilawakan pa niya ang abot ng kanyang tanaw.  Tumatakbo bilang Mayor ng San Pedro City, ang kanyang plataporma: peace and order, transparency at good governance.

“Hindi kailanman pumasok sa aking isip noon na ako ay hahawak ng pwesto sa gubyerno” sabi niya.  “Ngunit naininiwala ako na may plano para sakin ang nasa Itaas bilang isang public servant”. “Gusto kong maging isang first class city ang San Pedro” pahayag ni  Kap Jun. 

 Magtagumpay kaya siya? Maaaring isang malaking balakid ang kanyang kinakaharap sa bagong pagsubok na ito nguni’t sanay na naman siyang humarap sa ganito noon pa mang nag-uumpisa siya bilang negosyante. Marami na siyang pinagdaaanan hanggang sa siya ay magtagumpay. 

 Tulad ng ibang mga nagosyanteng dumaan sa maraming pagsubok, ilang beses din siyang bumagsak at bumangon noon bago niya nakamit ang tagumpay.    

Ayon sa pinakahuling Statement of Assets, Liabilities, and Net Worth (SALN) niya, mahigit na P1 bilyon na ang halaga ng kanyang assets, halos katumbas na ng budget ng isang pangkaraniwang-laking lungsod.       

Si Kap Jun ay isang huwarang padre de familia, isang mapagmahal na asawa sa kanyang kabiyak na si Carissa, at mabuting ama sa kanyang anim na anak.  Siya ay may kapatid na tumatakbo ring konsehal sa Lungsod ng Iloilo.  (The Daily Guardian)

Mga Kasambahay Kailangang Iparehistro sa Barangay

Inatasan kamakailan ni DILG Secretary Mel Senen S. Sarmiento ang mga barangay na obligahin ang bawa’t kabahayan na may kasambahay sa kanilang nasasakupan na iparehistro ang mga ito sa Kasambahay Master List.

“Bilang bahagi ng Barangay Assembly Day sa bawa’t barangay ngayong buwan ng Marso 2016, dapat isama sa pag-uusapan ang Barangay Registration ng mga Kasambahay” sabi ni Sarmiento.

Ipinaliwanag ng DILG Secretary na ito ay naaayon sa Republic Act No. 10361 o mas kilala bilang An Act Instituting Policies for the Protection and Welfare of Domestic Workers na inaprubahan ni Pangulong Aquino dalawang taon na ang nakalilipas.

“Ito ay isang paalala sa lahat ng mga opisyal ng barangay na huwag balewalain ang pagpaparehistro ng mga kasambahay.  Ang mga kinatawan ng Pag-IBIG, PhilHealth at SSS ay maaaring anyayahan para maglagay ng kanilang lamesa para tumanggap ng mga aplikasyon para maging miyembro” sabi ni Sarmiento.

Isinasaad ng batas na ang kasambahay ay sinuman na gumagawa bilang katulong sa bahay, “nurse maid” o yaya, tagapagluto, hardinero o tagapaglaba, nguni’t hindi kabilang ang sinuman na hindi tuluy-tuloy o pangmatagalan ang pamamasukan.

Hindi rin kabilang dito ang mga foster children, mga pinag-aaral o binibigyan ng baon, pamasahe, mga project o gawain sa eskwela.

Barangay Kasambahay Desk
Noong Hulyo 2013, inatasan ng DILG ang mga barangay na magkaroon ng Kasambahay Desks. Ang mga Punong Barangay ay pinagawa ng mga sistema para matiyak na ang pagpaparehistro ng lahat ng mga kasambahay sa kanilang barangay, kabilang na rito ang on-line registration sa pamamagitan ng kanilang website o e-mail.

Ang Kasambahay Registration Form (KR Form 1) at ang Kontrata sa Paglilingkod sa Tahanan ay maaaring makuha sa mga barangay at munisipyo o hindi kaya sa panglungsod na Public Employment Service Office (PESO). Maari ring mai-download ang mga ito mula sa  www.dilg.gov.ph and www.dole.gov.ph.

Kung sakaling natapos na ang kontrata, kalangang ipaalam kaagad sa  Kasambahay Desk ng amo para maitala ito.

Ipinagbabawal sa mga taga-barangay o ng lokal na tanggapan ng Public Employment Office ang pagbubunyag ng impormasyon tungkol sa kasambahay o ng tungkol sa amo.
Ito ay nasasakop Republic Act No. 10173 (Data Privacy Act of 2012) at iba pang mga batas.  Ang paglabag dito ay may kaukulang multa o pagkabilanggo. 

 Sarmiento enjoins continuous Barangay Registration of Kasambahays

Mga Tauhan ng Barangay sa Davao Nagsanay sa ‘Mobile Journalism’

Nagsanay kamakailan ang mga tauhan ng barangay sa Davao sa ‘Mobile Journalism’ para mag-ulat ng mga insidente ng illegal logging sa bayan ng Monkayo, Campostela.

Ang pagsasanay ay proyekto ng Department of Environment and Natural Resources XI, sa ilalim ng programa ng Monitoring and Coordinating Council ng National Task Force Diwalwal (PMCC-NTFD).

May 20 katao mula sa apat na barangay na kabilang sa Diwalwal Mineral Reservation Area (DMRA) ang lumahok sa pagsasanay sa Cellphone Photography at Videography na ginanap sa Grand Regal Hotel sa Lungsod ng Davao noong ika-15 hanggang 17 ng Pebrero, 2016.

Ang mga barangay na kalahok ay ang Barangay Salvacion, Mt. Diwata, Tubo-tubuo at Upper Ulip na pawang nasa Bayan ng  Monkayo, Compostela Valley.

Binigyan diin ni Atty. Chelin Joan Sonza Alug, hepe ng  administration division at PMCC Regional Program Coordinator, na layon ng pagsasanay na paigtingin ang pangangalaga ng kagubatan sa pamamagitan ng mga citizen-journalists.

“Inaasahan po namin kayo na magpapadala ng mga larawan at video ng mga iligal na gawain sa inyong nasasakupang lugar” sabi Atty. Alug sa mga lumahok sa seminar.

Ang pagsasanay ay isinigawa ng tanggapan ng Philippine Information Agency sa Region XI. (Ulat ni Michael Uy ng PIA Region XI: Barangaypersonnel trained on Mobile Journalism for DENR's Bantay Lasang)

Scholarship Grants Para sa Barangay Officials Isinulong sa Kongreso

Hiniling ng Sangguniang Panlalawigan ng Agusan del Norte kamakailan sa Committee on Education ng House of Senate at House of Representatives na maglaan ng pondo para sa Scholarship Grants Program ng mga opisyal ng barangay at kanilang mga anak.                                                            

Naipasa at inaprubahan ng Sangguniang Panlalawigan ang isang resolusyon na humihiling sa Kamara na isama ang paglalaan ng pondo sa General Appropriations Act para sa isang pangmatagalang pagkakaloob ng nasabing scholarship grant.  

Isinasaad ng Section 393 B (4) of RA 7160 o ang Local Gevernment Code of 1991 na ang punong barangay, mga kagawad, ingat-yaman at kalihim at ang kanilang mga anak at mga opisyal ng Sangguniang Kabataan o SK na nag-aaral sa mga kolehiyo at pamantasan ay walang bayad sa tuition habang sila ay nasa puwesto.  

Sa pagsunod sa nasabing batas,  ang Commission on Higher Education (CHED) naman ay nagpalabas ng Memorandum Order Nos. 62-1997 at 15-2009 para sa mga alituntunin ng mga State Universities at Colleges o SUCs sa nasabing scholarship grant.   

Ang problema, hindi kinikilala ng mga SUC ang nasabing programa dahil walang katiyakan ayon sa kanila na may pondong nakalaan mula sa pamahalaan at walang malinaw na mekanismo kung saan nila kukunin ang kabayaran sa tuition fees para sa mga scholarship beneficiaries.  

Ang Sangguniang Panlalawigan ng Davao Oriental at Marinduque ay nagpahayag ng pagkabahala sa isyung ito at umayon sa panukala ng Sangguniang Panlalawigan ng Agusan del Norte na hilingin sa pamahalaan na magkaroon ng malinaw na mekanismo kung paano matitiyak  na may pondo para sa programa.   

Sinang-ayunan at simuportahan naman ng Sangguniang Panlalawigan ng Agusan del Norte ang kahilingang ito at kaagad na nagsulong at inaprubahan ang isang resolusyon na hinihiling sa Kongreso na malutas na ang problema.  (PIA/Agusan Del Norte LGU)

Sumbungan sa Barangay ng 4Ps Itinalaga

Iniutos kamakailan ng tanggapan ng DSWD Region 2 sa Tuguegarao, Cagayan sa lahat ng Municipal Advisory Councils sa Region 2 na magkaroon ng mga Barangay Complaint Desks para harapin ang mga reklamo sa lugar tungkol sa Pantawid Pamilyang Pilipino or 4Ps.                                                                 

Sinabi ni Maricel Asejo, Information Officer ng nasabing tanggapan, marami silang natatanggap na reklamo tungkol sa programa at ang mga naging gawi ng mga nakatatanggap ng benepisyo.                      

“Sa pagkakaroon ng mga complaint desks, mabilis na matutugunan ang bawat reklamo ng mga beneficiaries at magawan ng agarang aksyon” sabi ni Asejo.  

Sinabi rin niya na isa sa mga bunga ng pagsasakatuparan ng programa ay ang pagpapalakas sa kakayahan at maisulong ang magandang pagtitinginan ng mga pamilyang nakatatanggap.   

Karamihan aniya sa mga reklamong kanilang nahaharap ay may kinalaman sa pagtrato ng mga kalalakihan sa kanilang asawa na siyang tumatanggap ng mga benepisyo. Bukod dito, nabanggit din niya ang pagkakasangkot ng mga ito sa bisyo tulad ng sugal at awayan ng mga pamilya.   

“Ito ang mga halimbawa ng mga reklamong idinudulog sa amin” dagdag pa niya.   

Ang complaint desk ay kinabibilangan ng mga kinatawan mula sa Municipal Local Government Office, Municipal Social Welfare and Development, Punong Barangay, Municipal Link at ang Parent Leader. (Philippine Information Agency)

Kaunlaran ng Barangay Malapit sa Puso ni Leni Robredo

Maraming mga panukalang batas ang naisampa sa Kamara na naglalayon na mapaunlad ang mga barangay at mapaglingkuran nang maayos ang mga mamamayan.                       

Si House Representative Leni Robredo      Google Photo

Ito ang pahayag ni Rep. Leni Robredo ng Ikatlong Distrito ng Camarines Sur, bilang panauhing tagapagsalita sa pagbubukas ng First Children’s Summit on Health sa Lungsod ng Dagupan kamakailan.        

Sinabi ni Robredo, kandidato sa pagka bise-presidente ng Liberal Pary sa darating na halalan, isa sa mga mahahalagang panukalang batas na naipasa na ay ang Bottom Up Budgeting (BUB) na napapakinabangan na ngayon ng maraming lungsod at bayan sa buong bansa.                         

Sa kanyang pahayag sa summit, na kung saan ay kabilang ang mga kapitan ng barangay ng Lungsod ng Dagupan, ang BuB ay kinakailangang maging isang matibay na sistema o institusyon ng pamamahala sa barangay kahit magpalit-palit man ng administrasyon.  

Nabanggit din niya na ang BuB ay pinasimulan ng kanyang yumaong asawa na si Jesse Robredo nang ito ay Kalihim pa ng Department of Interior and Local Government (DILG).  

Sabi pa ni Robredo na sa ilalim ng BUB, tanging mga pamahalaang bayan at lungsod lamang ang nakakakuha ngayon ng mula P15 hanggang P20 milyong proyekto mula sa pamahalaang nasyonal.  Ang mga proyektong ito ay pinili mismo ng mga mamayan sa pamamagitan ng mga People’s Organizations.   

Sa taong 2017, sabi niya, lahat ng barangay sa buong bansa ay makakakuha rin ng tig-P1 milyong halaga ng proyektong BuB na mismong mga mamamayan ang  siyang mamimili kung anong mga proyketo ang gusto nilang maipatupad.  

Bukod sa BuB, isinulong din niya na maging institusyon na rin ang Pantawid Pamilyang Pilipino Program (4Ps) para matiyak na ipagpapatuloy ng susunod na administrasyon ang magandang programang ito na pinakikinabangan na ngayon ng maraming mahihirap sa bansa.  

Ipinaliwanag din niya na malapit sa kanyang puso ang mga barangay dahil kasa-kasama niya ang mga ito noong Punong Lungsod pa ng Naga ang kanyang asawa. Binanggit niya na siya ay co-author din ng Barangay Reform Bill na naisampa na sa Kamara.   

Layon ng batas na ito na habaan ang termino ng mga opisyal ng barangay mula tatlo hanggang limang taon. Masyadong maikli aniya ang tatlong taon para sa mga opisyal ng barangay gayundin ng kanilang mga hinirang para matupad ang kanilang mga naipangako sa mamamayan. Kung ito’y maipapasa, may dadgag pang dalawang taon ang mga naihalal na opisyal.   

Ikinatuwa at nagpalakpakan ang mga dumalong opisyal ng barangay na naroroon sa pangunguna  nila Lino Fernandez at Bryan Kua nang sabihin ni Robredo na sadyang kailangan nang habaan ang termino ng mga opisyal para sa isang tunay na pagbabago sa lahat ng mga barangay sa buong bansa.  

Sinabi ng magandang kongresista na sa maiksing tatlong taon para mamuno ang mga bagong halal na opisyal ng barangay, napapalitan ang mga barangay health workers o BHW kapag may bagong kapitan.   

Ayon sa kanya, nakakaapekto ito sa tuloy-tuloy na pagbibigay ng mga programang pangkalusugan sa mga barangay.  

Sa kanyang naisulong na bill, sasagutin ng pamahalaang nasyunal ang sweldo ng mga health workers at tanod gayundin ng iba pang mga volunteer workers sa barangay para matiyak na ang sweldo nila ay magkakapantay-pantay sa buong bansa.  

Iminungkahi pa niya na ang mga pagsasanay at seminar para sa mga opisyal ng barangay ay sagutin na rin ng pamahalaang nasyunal at hindi na manggagaling pa sa budget ng barangay para masinop ang limitadong budget nito.  

Sa panukalang ito ay magtatakda rin ng pagkakaroon ng pensiyon ang mga barangay health workers kapag nakakumpleto sila ng siyam na taong tuluy-tuloy na serbisyo bilang pabuya sa kanilang dedikasyon sa tungkulin.  (Barangay Reporter)